من و یزداں

نیاز پوری اور الحاد –
ایاز نظامی صاحب نے اگر اس قدر شد و مد کے ساتھ نیاز پوری صاحب کی تصنیف پیش فرمائی تو اس کے پیچھے ظاھر ھے یہی مقصد تھا کہ لوگوں کو بتایا جائے کہ الحاد کس طرح انسان میں قسط در قسط پیدا ھوتا ھے ، اس کا بیج کیونکر لگتا اور کس موسم میں پنپتا ،پھولتا اور پھلتا ھے – یہ الحاد کی دردناک داستان اپنے اندر عبرت کا سامان رکھتی ھے – ایک طرف ملحدین کو ننگا کرتی ھے کہ وہ ضد میں مبتلا ھونے کے بعد کس طرح ایک دائرے میں چکر کاٹتے ھوئے کریش کرنے سے پہلے اپنے فیول ٹینک گراتے ھیں اور پھر پاتال سے جا ٹکراتے ھیں – اپنے لئے روشنی کا ایک ایک در اور روزن بند کرتے چلے جاتے ھیں تا کہ تہہ در تہہ ظلمات میں کہیں سے روشنی کی کوئی کرن ان تک پہنچ نہ جائے
(( اللَّهُ وَلِيُّ الَّذِينَ آمَنُوا يُخْرِجُهُم مِّنَ الظُّلُمَاتِ إِلَى النُّورِ ۖ وَالَّذِينَ كَفَرُوا أَوْلِيَاؤُهُمُ الطَّاغُوتُ يُخْرِجُونَهُم مِّنَ النُّورِ إِلَى الظُّلُمَاتِ ۗ أُولَٰئِكَ أَصْحَابُ النَّارِ ۖ هُمْ فِيهَا خَالِدُونَ (البقرہ-257)
اللہ ولی ھے ایمان والوں کا ان کو اندھیروں سے روشنی کی طرف نکال لاتا ھے ،اور جو لوگ کافر ھیں ان کے اولیاء تو طاغوت ھیں وہ ان کو روشنی سے اندھیروں کی طرف کھینچ لے جاتے ھین ، یہ لوگ آگ والے ھیں وہ اس میں ھمیشہ رھیں گے –
ولی وہ ھوتا ھے جس کو انسان اپنے امور میں کرتا دھرتا اور ذمہ دار سمجھتا ھے اور اس پر اعتماد رکھتے ھوئے اپنے معاملات اس کو سونپ دیتا ھے ،، مومن جب صدق دل سے اللہ کو اپنا خیر خواہ سمجھتے ھوئے اپنا آپ اس کو سونپ دیتا ھے تو مشکل سے مشکل مرحلے میں بھی اللہ کی ھدایت جس کو اللہ کا نور کہا جاتا ھے اس تک پہنچ کر رھتا ھے ، اللہ کے نیٹ ورک کو کوئی جام نہیں کر سکتا ، بلکہ اللہ ھی کس بھی نیٹ ورک کو جام کر دیتا ھے – آیت ” اللہ نور السماوات والارض” یہی خوش خبری سناتی ھے کہ نہ صرف مادی روشنی کے سارے اسباب اللہ ھی کے پیدا کردہ ھیں بلکہ معنوی روشنی بھی اللہ ھی کے ھاتھ میں ھے ، راہ ھدایت کے سارے ذرائع اس کے دست قدرت میں ھیں ،مانگنے والے میں خلوص ھونا چاہیے ھدایت کی ڈیلیوری سروس میں کبھی تعطل پیدا نہیں ھو سکتا ، والذین جاھدوا فینا لنھدینھم سبلنا ، یہی گارنٹی دیتی ھے کہ جو ھماری تلاش میں نکلتے ھیں وہ منزل پر پہنچ کر رھتے ھیں کیونکہ ان کا ہاتھ ھمارے ہاتھ میں ھوتا ھے –
دوسری جانب یہ تحریر علماء کے لئے ایک مثال ھے کہ جب انسان کو فتؤوں کی توپ کے آگے رکھ لیا جائے تو وہ جانتے بوجھتے ھوئے جاھل ، دیکھتے ھوئے اندھا اور سنتے ھوئے بہرہ بن جاتا ھے ، یہ بڑی ضدی مخلوق ھے ، یہی واحد مخلوق ھے جس میں اللہ نے روح پھونکی ھے اور اس کوساتھ میں انا کا تڑکا بھی لگ گیا ،، یہی وجہ ھے کہ اللہ پاک نے موسی اور ھارون علیہما السلام کو یہ ھدایت کر کے بھیجا تھا کہ فرعون سے نرمی کے ساتھ بات کرنا تا کہ وہ نصیحت کو قبول کر لے یا ڈر جائے – اللہ کو معلوم تھا کہ فرعون نے کیا کرنا ھے مگر وہ یہ چاھتا تھا کہ حشر کی عدالت میں فرعون اپنی گمراھی کو موسی علیہ السلام کے طرز تکلم سے منسوب نہ کر دے کہ اے اللہ اس نے مجھے مخاطب ھی اس طرح کیا کہ میرا دماغ بھک سے اڑ گیا اور میں سوچنے سمجھنے کی صلاحیت کھو بیٹھا –
نیاز فتح پوری نے ابتدا میں ایک نظریہ پیش کیا ھے جس میں دنیا کے تمام مذاھب کو مسلمانوں میں موجود فرقوں کی طرز پرڈیل کرنے کا مشورہ دیا گیا ھے ، یعنی اللہ کے وعدے کے مطابق ھر قوم اور ھر بستی میں کسی نہ کسی ڈرانے والے کا وجود ضروری ھے ، و ان من قریۃٍ الا خلا فیھا نذیر – کوئی بستی ایسی نہیں گزری جس میں ڈرانے والا نہ آیا ھو ،، اور وما کنا معذبین حتی نبعث رسولا ً،، ھم کبھی کسی قوم کو عذاب نہیں دیتے ھوتے جب تک کہ اس میں رسول مبعوث نہ کر دیں،، بالکل اس بات کو واضح کرتی ھے کہ اسلام سے پہلے کے تمام مذاھب کسی نہ کسی نبی یا رسول کے ھی پیرو ھیں کہ جنہوں نے اپنے اپنے مذھب میں مختلف بدعات داخل کر کے ان کو بگاڑ لیا ھے مگر ان کی اصل آسمانی ھی ھے جو ان کی کتابوں میں مل جاتی ھے ، بالکل اسی طرح جیسے مارکیٹ کا اسلام اور ھے اور قرآن و سنت کا اسلام اور ھے ، جو شیعہ محرم میں کرتے ھیں وہ کتابوں میں نہیں ھے اور جو میلاد پر سنی کرتے ھیں وہ بھی اسلام کی کتابوں میں نہیں ھے ، البتہ فرقوں کی اپنی اپنی کتابوں میں ھو سکتا ھے –
اللہ پاک نے تمام عبادتگاھوں کو تحفظ دیا ھے اور نبئ کریم ﷺ نے بھی میثاقِ مدینہ میں ان کو تحفظ دیا ھے بلکہ ایمان والوں کے جہاد کا نصاب ھی یہ مقرر کیا ھے کہ وہ مساجد کے ساتھ عیسائیوں کے چرچ ، ان کی خانقاہ ، یہود کے سینگاگ کا بھی تحفظ کریں گے اور اگر وہ ان کا دفاع نہیں کر پاتے تو خود ان کے جہاد پر ھی سوالیہ نشان لگ جاتا ھے –
سورہ حج کی ان آیات میں کہ جو سفرِ ھجرت کے دوران نازل ھوئیں اور مسلمانوں کو ہتھیار اٹھانے کی اجازت دی گئ اسی وقت یہ طے کر دیا گیا تھا کہ یہ جہاد ھر مذھب کی عبادات کے تحفظ کو یقینی بنائے گا نہ کہ ان کو تباہ کرے گا ، اللہ کی نصرت حاصل ھی اس گروہ کو ھو گی جو ان شرائط کا خیال رکھے گا اور اسی کو اللہ کی نصرت کہا گیا ھے کہ اگر تم اللہ کی نصرت کرو گے شرائط کی پابندی میں تو اللہ بھی تمہاری نصرت کرنے گا تمہیں کامیاب و کامران کرنے میں –
(( ( وَلَوْلا دَفْعُ اللهِ النَّاسَ بَعْضَهُمْ بِبَعْضٍ لَهُدِّمَتْ صَوَامِعُ وَبِيَعٌ وَصَلَوَاتٌ وَمَسَاجِدُ يُذْكَرُ فِيهَا اسْمُ اللَّهِ كَثِيراً وَلَيَنْصُرَنَّ اللَّهُ مَنْ يَنْصُرُهُ إِنَّ اللَّهَ لَقَوِيٌّ عَزِيزٌ( الحج- 40)
یہاں تک فتح پوری کی بات درست تھی اور قابلِ غور بھی ، مگر جب ان پر فتؤوں کی برسات ھوئی تو وہ بھی ضد میں مبتلا ھو گئے اور ایک ایک کر کے اسلام کی ھر چیز سے دست بردار ھو کر ٹھیک وھیں جا کھڑے ھوئے جہاں نظامی صاحب اور ان کی امت کھڑی ھے ، کتاب کا تازہ ترین عنوان ھونا چاھئے تھا ” الحاد کے مراحل ”
میں چیلنج دیا کرتا ھوں کہ انسانیت کوئی ایسا اعتراض اب قیامت تک نہیں سوچ سکتی جس کا ذکر قرآن نے پہلے کر کے اس کا جواب نہ دے دیا ھو،، ان کے اعتراضات ھی نہیں دل بھی پہلوں سے مشابہ ھیں ،،،
اللہ پاک نے جہاں نبئ کریم ﷺ کو ” قُل ” کہا ھے اللہ کے رسول ﷺ نے قل صرف کہا ھی نہیں بلکہ قل کے ساتھ درج بھی کرایا ھے اور یہ قل بتا رھا ھے کہ کوئی اور ھستی رسول اللہ ﷺ کو حکم دے رھی ھے ، توحید کی حد تک تو یہ بات کہی جا سکتی ھے کہ نبئ کریم ﷺ کے اندر توحید کا سمندر ٹھاٹھیں مار رھا تھا ،مگر وہ جو پچھلی امتوں کے واقعات اللہ پاک نے اپنے رسول ﷺ پر نازل فرمائے اوراس تاکید کے ساتھ کہ یہ ھم ھیں جو آپ پر یہ آیات نازل کر کے آپ اصل حقائق بتا رھے ھیں ورنہ آپ تو اس وقت ان میں موجود نہیں تھے ،،
1- ذالک من انباء الغیب نوحیہ الیک وما کنت لدیھم اذ یلقون اقلامھم ایھم یکفل مریم وما کنت لدیھم اذ یختصمون … آل عمران- 44
یہ غیب کی خبریں ھیں جو ھم آپ کو وحی کرتے ھیں ورنہ آپ ان کے پاس نہیں تھے جب وہ قرعہ کے لئے اپنی قلمیں ڈال رھے تھے اور نہ آپ اس وقت ان کے پاس تھے جب وہ آپس میں جھگڑ رھے تھے –
2- وَمَا كُنْتَ بِجَانِبِ الْغَرْبِيِّ إِذْ قَضَيْنَا إِلَى مُوسَى الْأَمْرَ وَمَا كُنْتَ مِنَ الشَّاهِدِينَ ﴿ القصص-44﴾
اور آپ اس وقت وادئ سینا کے مغربی حصے میں موجود نہیں تھے اور نہ ھی یہ سارا واقعہ دیکھ رھے تھے( جو موسی علیہ السلام پر گزرا )
3- وَمَا كُنْتَ ثَاوِيًا فِي أَهْلِ مَدْيَنَ تَتْلُو عَلَيْهِمْ آيَاتِنَا وَلَكِنَّا كُنَّا مُرْسِلِينَ ﴿القصص-45﴾
اور نہ آپ اس وقت اھل مدین میں مقیم ھو کر ان پر ھماری آیات پڑھ رھے تھے ( جب موسی اور شعیب علیہما السلام میں مکالمہ چل رھا تھا ) بلکہ ھم ھی رسول بھیجنے والے تھے
اسی طرح قرآنِ حکیم کو پڑھنے والا عام انسان بھی اس بات کو محسوس کر لیتا ھے کہ کہاں اللہ پاک اپنے رسول کو بطور متکلم حکم دے رھا ھے ،کہاں وعدہ کر رھا ھے اور کہاں وعید سنا رھا ھے – اتنے بڑے علامہ کا ساری حیثیتیں رسول اللہ ﷺ کو دے دینا کہ وھی خدا تھے ،جو کہ متکلم تھے ، وھی جبرائیل تھے جو کہ واسطہ تھے اور وھی محمد ﷺ تھے کہ جو مخاطب تھے ، اور جس پر یہ کیفیت گزر رھی تھی وہ خود ھی اس سے آگاہ نہیں تھے بلکہ علامہ صاحب کو اپنے اندر سے وحی نے آگاہ کیا ھے ، جبکہ جس ھستی پر قرآن نازل ھوا وہ اس کے ایک ایک لفظ کو کلام اللہ کے طور پر درج کرا رھے ھیں اور اپنا کلام اس دوران لکھنے پر پابندی لگا رھے ھیں ، اپنا کلام نماز میں نہیں پڑھتے بلکہ اللہ کا کلام ھی ھمیشہ پڑھتے ھیں ،،
پہلے اللہ علامہ کی سمجھ میں نہ آیا ،، پھر رسالت بھی سمجھ میں نہ آئی اور رسالت کو نبی ﷺ کی اپنی اپچ سمجھ لیا کہ آپ نے بہت ضبط کیا مگر آخرکار پھٹ پڑے اور توحید کا بیان شروع کر دیا ،،،
اس سلسلے میں وحی کے لفظ کو لے کر لغت سے اس کے معانی بیان کیئے گئے کہ شیاطین بھی وحی کرتے ھیں ( اپنے دوست کے دل میں خیال ڈالتے ھیں)،، موسی کی ماں کو بھی وحی کی گئ( دل میں خیال ڈالا گیا ) ، اور شھد کی مکھی کو بھی وحی کی گئ اور زمین کو بھی وحی کی جائے گی جب وہ اپنے راز فاش کرے گی ،، گویا رسول اللہ ﷺ پر وحی بھی خیال قسم کی تھی ،، ایک لفظ کے لغوی معانی پچاس بھی ھو سکتے ھیں مگر جب رسول ان میں سے کوئی متعین کر لیتے ھیں تو بس وھی مفھوم شرعی کہلاتا ھے –
جبکہ رسولوں کو وحی کی اقسام اللہ پاک نے ایک ھی آیت میں بیان کر دی ھیں ،،
وَمَا كَانَ لِبَشَرٍ أَنْ يُكَلِّمَهُ اللَّهُ -إِلا وَحْيًا، 2- أَوْ مِنْ وَرَاءِ حِجَابٍ 3- أَوْ يُرْسِلَ رَسُولا فَيُوحِيَ بِإِذْنِهِ مَا يَشَاءُ إِنَّهُ عَلِيٌّ حَكِيمٌ (شوری- 51) اللہ کسی بشر سے آمنے سامنے گفتگو نہیں کرتا بلکہ ،،
1- یا تو براہ راست اس پر وحی کرتا ھے ( اور نبئ کریم ﷺ کے فرمان کے مطابق یہ وحی کی سخت ترین صورت ھوتی ھے یعنی جب رسول کو ھی فرشتے کا کام بھی کرنا پڑ جائے یعنی وحی رسول پر ھی ڈی کوڈ ھو رھی ھو تو رسول دھری مشقت میں ھوتے ھیں اور اس وقت آپ ﷺ کا وزن اس قدر بڑھ جاتا تھا کہ اونٹنی کی ٹانگیں کانپنا شروع ھو جاتیں ،پھر وہ بیٹھ جاتی اور آخر بے بسی کے عالم میں اپنی گردن زمین پر ڈال دیتی ، اس وقت رسول اللہ ﷺ اس کیفیت میں بھی اس پر ترس کھاتے ھوئے اس پر سے اتر جاتے تھے ،خود رسول اللہ ﷺ کا حال کیا ھو گا جس بوجھ سے اونٹ جیسے لدو جانور کا یہ حال ھو گیا ھے -؟ یہ وحی ایک مسلسل ٹک ٹک ٹک ٹک ٹک کی طرح نازل ھو رھی ھوتی تھی جیسے کوئی زنجیر ایک پتھریلی زمین پر گھسیٹی جا رھی ھو شیاطین اس وحی کو ڈی کوڈ نہیں کر سکتے تھے ، اس کا ڈی کوڈر صرف رسول کے اندر رکھا جاتا ھے جہاں وہ الفاظ اور آواز کا روپ دھارتے جا رھے ھوتے تھے) جبکہ وحی کے نزول کے بعد وھی تلاوت کرتے ھوئے اونٹنی پر کوئی فرق نہیں پڑتا تھا ،
2- قسم ھے کہ خود پردے کے پیچھے رہ کر کسی دوسری چیز کو کلام کے لئے استعمال فرمانا جیسا کہ درخت میں سے اللہ کی آواز موسی علیہ السلام کو آ رھی تھی اور وہ درخت تجلیات سے بقع نور بنا ھوا تھا ، اسی طرح طور پر بھی پہاڑ کے پیچھے سے آواز آیا کرتی تھی اور موسی علیہ السلام کے کان اس کو سنا کرتے تھے اس لئے موسی علیہ السلام کی وحی کو سب رسولوں سے الگ نام دیا گیا یعنی ” کلم اللہ موسی تکلیماً ” اللہ نے موسی سے بات کی جس طرح عام بات کی جاتی ھے
3- یا رسول یعنی فرشتے کو پیغامبر بنا کر بھیجا جاتا ھے کہ وحی پہلے فرشتے پر ڈی کوڈ ھوتی ھے اور فرشتہ اس کو الفاظ کی صورت میں رسول ﷺ تک پہنچاتا ھے – رسول اللہ ﷺ کے فرمان کے مطابق یہ وحی کی سب سے آسان قسم ھوتی تھی کہ براہ راست تجلیوں کا بار فرشتہ سہہ لیتا تھا